Familjet shqiptare kanë shtrënguar sërish shpenzimet për konsum. Instituti i Statistikave deklaroi se në tremujorin e parë të vitit konsumi i popullatës u rrit me vetëm 1.94 për qind, çka përbën normën e dytë më të ulët që nga fillimi i vitit 2015.

Rënia e ritmit të shpenzimeve për konsum sinjalizon se familjet shqiptare nuk kanë fituar më shumë të ardhura ose janë ende pesimistë për situatën e tyre financiare në të ardhmen.
Konsumi i popullatës përbën peshën kryesore të shpenzimeve në ekonomi. Hezitimi i familjeve për të shpenzuar frenon ndjeshëm rritjen ekonomike të vendit.

Deri tani ky efekt negativ është kompesuar pjesërisht nga rritja e lartë e investimeve. Sipas INSTAT, në tremujorin e parë të vitit investimet në ekonomi u rritën me 10.8 për qind krahasuar me një vit më parë, falë rritjes së shpenzimeve publike, por kryesisht gazsjellësit Transadriatik dhe Kaskadës së Devollit.

Dy projektet e kontraktuara nga qeveria e mëparshme janë duke mbajtur gjallë rritjen ekonomike të vendit, ndërkohë që investimet e reja janë thuajse inekzistente.

Grafiku i punimeve parashikon që TAP dhe Kasakada e Devollit do të kenë një ritëm më të ulët investimesh gjatë vitit që vjen, i cili nëse nuk do të kompesohet nga faktorë të tjerë vë në pikëpyetje qëndrueshmërinë e rritjes ekonomike,

Institucionet presitigjoze ndërkombëtare, si Fondi Monetar dhe Komisioni Europian kanë bërë thirrje për diversifikimin e burimeve të rritjes. Por deri më tani qeveria shqiptare nuk ka arritur të kontraktojë asnjë investim të ri, me impakt në rritjen ekonomike.